పవర్ స్టార్ పవన్ కళ్యాణ్ ( Pawan Kalyan) సినీ కెరీర్ ఇప్పటివరకు ఒక లెక్క. ఇక మీదట మరో లెక్క. ఇంతకుముందు పవన్ రాజకీయాల్లో యాక్టివ్ గా ఉంటూనే అటు సినిమాలు చేసేవారు. ఇప్పుడు పరిస్థితులు మారాయి. ఆయన డిప్యూటీ సీఎం గా, వివిధ శాఖలకు మంత్రిగా బాధ్యతలు తీసుకున్నారు. ఇక మీదట సినిమాలు చేయడానికి ఎక్కువ సమయం కుదరకపోవచ్చు. ఏమాత్రం వీలు దొరికినా ఆయన ముందుగా కమిట్ అయిన ‘ఓజీ ‘ పూర్తి చేస్తారు. తర్వాత ‘హరిహర వీరమల్లు’ సినిమాపై దృష్టి పెడతారు. ఎటొచ్చి ప్రశ్నార్ధకంగా మారింది హరీష్ శంకర్ సినిమానే.
ఆయన దర్శకత్వంలో పవన్ ‘ఉస్తాద్ భగత్ సింగ్ ‘ సినిమా చేస్తున్న విషయం తెలిసిందే. ఈ సినిమా కొన్ని రోజుల షూటింగ్ కూడా పూర్తి చేసుకుంది. ఈ మధ్య ఓ వీడియోను కూడా రిలీజ్ చేశారు. కానీ ప్రస్తుతం ఆ ప్రాజెక్టు పూర్తిచేసే పరిస్థితి లేదనే టాక్ వినిపిస్తోంది. ఈ సినిమాని పూర్తిగా క్యాన్సిల్ చేయడమో లేదా కొంతకాలం పాటు వాయిదా వేయడమో జరుగుతుందన్న చర్చ నడుస్తోంది.
ఈ కారణంగానే హరీష్ శంకర్ తన దృష్టి అంతా రవితేజతో చేస్తున్న ‘మిస్టర్ బచ్చన్’ సినిమాపై పెట్టారని ఆ తర్వాత ఆయన మెగాస్టార్ చిరంజీవితో సినిమా చేస్తారని సినీవర్గాల్లో టాక్ వినిపిస్తోంది. ఆచార్య ప్రమోషన్స్ లో భాగంగా చిరుని, రామ్ చరణ్ ని ఇంటర్వ్యూ చేసిన హరీష్.. మెగాస్టార్ తో సినిమా చేయాలనుందని తన మనసులో మాట బయటపెట్టారు.
మంచి స్క్రిప్ట్ దొరికితే ఖచ్చితంగా చేస్తామని చిరు కూడా మాటిచ్చారు. ఈ నేపథ్యంలో రవితేజ సినిమా తర్వాత చిరు సినిమానే ఫైనల్ అయ్యేలా కనిపిస్తోంది.