సీనియర్ జర్నలిస్టు, మీడియా మొఘల్ రామోజీరావు ఇటీవల మరణించిన దరిమిలా, ఆంధ్ర ప్రదేశ్ ప్రభుత్వం ఓ సంస్మరణ కార్యక్రమాన్ని నిర్వహించింది. అసలాయనకు అధికారికంగా సంస్మరణ సభని ప్రభుత్వం ఎందుకు నిర్వహించాలన్న చర్చ అంతటా జరుగుతోంది.
మీడియా రంగానికి రామోజీరావు చేసిన ‘సేవల’ గురించి కొత్తగా చెప్పాల్సిన పనిలేదు. ఆ సేవల్ని ఒక్కొక్కరూ ఒక్కోలా అభివర్ణిస్తుంటారు. దాన్ని రాజకీయ సేవగానూ కొందరు పేర్కొంటుంటారు. సరే, ఎవరి అబిప్రాయం వారిది.
మీడియా మొఘల్ మాత్రమే కాదు, పలు సినిమాలు నిర్మించిన సినీ నిర్మాతగానూ ఆయనకు గుర్తింపు వుంది. రామోజీ ఫిలిం సిటీ, ఎంటర్టైన్మెంట్ ఛానళ్ళు, ఓటీటీ, ప్రియా పచ్చళ్ళు, మార్గదర్శి.. చెప్పుకుంటూ పోతే కథ పెద్దదే.
పెద్దాయన చనిపోయారని తెలుసుకుని, టీడీపీ అధినేత చంద్రబాబు తీవ్ర దిగ్భ్రాంతికి గురయ్యారు.. రామోజీరావు పాడెని చంద్రబాబు మోశారు కూడా. అది ఆయన వ్యక్తిగతం. కానీ, రామోజీరావు సంస్మరణ సభను, అధికారికంగా నిర్వహించడం మీదనే రాద్దాంతం జరుగుతోంది. దానిక్కారణం, ప్రజాధనాన్ని వెచ్చించడమే.
అంతే కాదు, పత్రికల్లో ప్రకటనలు కూడా ఇచ్చింది ఆంధ్ర ప్రదేశ్ ప్రభుత్వం. ఓ వైపు, రాష్ట్రం ఆర్థిక ఇబ్బందుల్లో వుందని చెబుతూనే, ఇంకో వైపు ప్రభుత్వం తరఫున ఈ దుబారా ఏంటన్న చర్చ సహజంగానే తెరపైకొస్తుంటుంది.
చంద్రబాబు సొంత ప్రభుత్వంలో ఇలాంటివి జరిగితే ఓ లెక్క.. కానీ, ఇప్పుడున్నది కూటమి ప్రభుత్వం. ఈ దుబారాని జనసేన, బీజేపీ ఎలా సమర్థించుకుంటాయన్న ప్రశ్నలూ ఉత్పన్నమవుతున్నాయి. ప్రభుత్వవం తరఫున కాకుండా, పార్టీ తరఫున గనుక టీడీపీ ఈ సంస్మరణ సభను నిర్వహించి వుంటే బావుండేదేమో.!
ఈనాడు వల్ల ఎంతమంది వృద్ధిలోకి వచ్చారో, అంతమంది ఇబ్బందులు పడ్డారన్న వాదనా లేకపోలేదు. అలాంటప్పుడు, మీడియా రంగానికి రామోజీ చేసిన సేవ వుందని ప్రశ్నించేవారూ వున్నారు మరి.! మార్గదర్శి వివాదం సంగతి సరే సరి.! ఏదిఏమైనా, పోయినోళ్ళంతా మంచోళ్ళేనని సరిపెట్టుకోవాల్సిందేనేమో.!
అయ్యిందేదో అయిపోయిందనుకోవడానికి వీల్లేదు. ప్రజలు అన్నిటినీ గమనిస్తారు. ప్రజాధనం వృధాపై టీడీపీ, జనసేన, బీజేపీ గతంలో చాలా మాట్లాడాయ్. వైసీపీ హయాంలో జరిగిన ఈ తరహా దుబారాపై జనం విసిగిపోయారు. కూటమి ప్రభుత్వంలోనూ అదే దుర్వినియోగమంటే, ప్రజలు సహించే పరిస్థితి వుండకపోవచ్చు.
రామోజీరావు టీడీపీకి రాజగురువు అయితే కావొచ్చు.. రాష్ట్ర ప్రజలకు కాదు కదా.! అన్నట్టు, అమరావతి నిర్మాణానికి రామోజీ కుటుంబం (వ్యాపార సంస్థల తరఫున) 10 కోట్ల రూపాయల విరాళాన్ని అందించడం కొసమెరుపు.