‘కల్కి’ సినిమా సోషల్ మీడియా వేదికగా ‘ఆంధ్రా – తెలంగాణ’ అనే రచ్చకు కారణమవుతోందా.? నిజానికి, ఇది సినిమా సంబంధిత వ్యవహారం కాదు. సినిమాలో అలాంటి వివాదాలకు ఎలాంటి ఆస్కారమూ ఇవ్వలేదు. కాకపోతే, అర్జునుడిగా నటించిన విజయ్ దేవరకొండ విషయమై ట్రోలింగ్ జరుగుతోందంతే. దాని చుట్టూ తెలంగాణ – ఆంధ్ర అనే వివాదాలు నడుస్తున్నాయ్.
అసలు ఈ వివాదానికి సృష్టికర్తలెవరు.? సినీ రంగంలో ఆంధ్ర – తెలంగాణ అన్న తేడాల్లేవ్. అంతా తెలుగు సినిమానే. కానీ, ఒకప్పటి తెలంగాణ – ఆంధ్రా గొడవల్ని మళ్ళీ పునఃప్రారంభించేందుకు కొన్ని రాజకీయ శక్తులు ఏకతాటిపైకి వస్తున్నాయి. ప్రధానంగా బీఆర్ఎస్, వైసీపీ.. ఈ ప్రాంతీయ వాదాల్ని పెంచి పోషిస్తున్నాయి.
విజయ్ దేవరకొండని ట్రోల్ చేసే క్రమంలో, ఆంధ్రా – తెలంగాణ అంశాన్ని ప్రధానంగా బీఆర్ఎస్ తెరపైకి తెస్తోంది. బీఆర్ఎస్ పార్టీ నాయకులు నేరుగా ఈ విషయమై ఎక్కడా మాట్లాడకపోయినా, ఆ పార్టీకి మద్దతుగా వుంటోన్న కొన్ని సోషల్ మీడియా హ్యాండిల్స్.. ఈ మొత్తం రచ్చకు కారణమవుతున్నాయి.
అదే సమయంలో, తెలుగు సినిమా తెలంగాణని వదిలేసి, ఆంధ్రాకి వెళ్ళిపోతుందట.. అంటూ కొన్ని పుకార్లు వైసీపీ అనుకూల సోషల్ మీడియా హ్యాండిల్స్ నుంచి దర్శనమిస్తున్నాయి. చూస్తోంటే, ఇదంతా ఓ పద్ధతి ప్రకారం జరుగుతున్న రాజకీయ కుట్రలా కనిపిస్తోంది.
తెలంగాణలో ఇటీవల జరిగిన లోక్ సభ ఎన్నికల్లో బీఆర్ఎస్ గుండు సున్నా చుట్టేసిన సంగతి తెలిసిందే. అంతకు ముందు తెలంగాణలోనే జరిగిన అసెంబ్లీ ఎన్నికల్లో బీఆర్ఎస్ ఓడిపోయింది. ఆంధ్ర ప్రదేశ్ అసెంబ్లీ అలాగే సార్వత్రిక ఎన్నికల్లో వైసీపీ దారుణ పరాజయాన్ని చవిచూసింది.
తెరవెనుకాల బీఆర్ఎస్ – వైసీపీ ఒకదానికొకటి సహకరించుకున్నా, రెండు పార్టీలూ అధికారం కోల్పోయాయి. అధికారం కోల్పోయాక.. ఇదిగో, ఇప్పుడిలా ప్రాంతీయ విద్వేషాలకు తెరలేపేలా రాజకీయ కుట్రలు ఇరు పార్టీలు చేస్తున్నట్లు తెలుస్తోంది. దానికి, సినిమాని ఓ అవకాశంగా ఈ రెండు పార్టీల సానుభూతిపరులూ వాడుకుంటున్నారంతే.