Bala Krishna: అభిమాన హీరోలపై అభిమానులు చూపే ప్రేమాభిమానాలకు లెక్కలుండవు. జులాయి సినిమాలో అల్లు అర్జున్ డైలాగ్.. ‘నేను వాడి ఫ్యాన్.. వాడెప్పుడూ టాప్ లోనే ఉండాలి’ అని ఉంటుంది. అభిమానులను కూడా హీరోలు ఇలాగే అభినిస్తూ ఉంటారు. సందర్భం వచ్చినప్పుడు మీటింగ్స్ ఏర్పాటు చేయడం.. ఫొటోషూట్స్ వంటివి చేస్తూంటారు. ఈతరహాలోనే ఓ అరుదైన సందర్భం బాలకృష్ణ-ఆయన అభిమానికి మధ్య జరిగింది.
కర్నూలు జిల్లా ఓర్వకల్లు రాక్ గార్డెన్స్ లో బాలకృష్ణ (Bala Krishna) 109వ సినిమా షూటింగ్ జరుగుతోంది. ఈక్రమంలో తన వీరాభిమాని.. నందమూరి యువసేన సేవా సంస్థ అధ్యక్షుడు సజాద్ కు బాలయ్య కబురు పంపించారు. దీంతో సజాద్ కుటుంబసమేతంగా షూటింగ్ స్పాట్ కు వచ్చారు. అభిమాన హీరోను కలిసి ముచ్చటించారు.. సంబరపడిపోయారు.
అనంతరం బాలకృష్ణ వారితో కలిసి భోజనం చేశారు. సజాద్ కుమారుడితో ముచ్చట్లు చేశారు. ఇందుకు సంబంధించిన వీడియో ప్రస్తుతం వైరల్ అవుతోంది. బాలయ్య ఆత్మీయ పలకరింపు, స్వాగతంతో ఎంతో సంతోషంగా ఉందని సజాద్ ఆనందం వ్యక్తం చేశారు.