బీజేపీ రివర్స్ ఎటాక్: ఏపీ డీజీపీ మళ్ళీ స్పందిస్తారా.?

దేవాలయాలపై దాడులు తదితర వ్యవహారాలపై ఆంధ్రపదేశ్ డీజీపీ గౌతమ్ సవాంగ్ ఇటీవల చేసిన ప్రకటన పెను రాజకీయ దుమారానికి కారణమైంది. బీజేపీ, టీడీపీలకు చెందిన పలువురు కార్యకర్తలు, సానుభూతిపరుల్ని ఆయా కేసుల్లో అరెస్ట్ చేసినట్లు డీజీపీ గౌతమ్ సవాంగ్ వెల్లడించిన విషయం విదితమే. అయితే, దాడుల అనంతరం జరిగిన దుష్ప్రచారానికి సంబంధించి నిందితుల్ని అరెస్ట్ చేశామన్నది డీజీపీ ప్రకటన సారాంశం.

కానీ, వైసీపీ అనుకూల మీడియాలో మాత్రం ఈ వ్యవహారంపై ప్రచారం ఇంకోలా సాగింది. నిజానికి, ముఖ్యమంత్రి వైఎస్ జగన్ స్వయంగా, దేవాలయాలపై దాడుల వ్యవహారం విపక్షాల కనుసన్నల్లో జరిగిందని సెలవిచ్చారు. వైసీపీ ముఖ్య నేత, ఆ పార్టీ రాజ్యసభ సభ్యుడు విజయసాయిరెడ్డి అయితే, రాత్రిళ్ళు టార్చిలైట్ వేసుకుని.. అంటూ చంద్రబాబుపై నిప్పులు చెరిగిన విషయం విదితమే. ముఖ్యమంత్రి సహా వైసీపీ నేతల వ్యాఖ్యలకు అనుగుణంగానే డీజీపీ ప్రకటన వుందంటూ విపక్షాలు మండిపడ్డాయి.

సజ్జల స్క్రిప్ట్, వైఎస్ జగన్ డైరెక్షన్, డీజీపీ యాక్షన్.. అంటూ మాజీ ముఖ్యమంత్రి, టీడీపీ అధినేత చంద్రబాబు సెటైర్ కూడా వేశారు. ఈ మొత్తం వ్యవహారంపై బీజేపీ తీవ్ర అసహనం వ్యక్తం చేస్తోంది. ఏపీ బీజేపీ అధ్యక్షుడు సోము వీర్రాజు ఈ మేరకు ఏపీ డీజీపీకి లేఖాస్త్రం సంధించడం గమనార్హం. మీడియాలో, డీజీపీ వ్యాఖ్యల పేరుతో వచ్చిన కథనాల్లో ‘దేవాలపై దాడులకు బీజేపీకి సంబంధం వుంది’ అన్నట్లుగా అర్థం కనిపిస్తోందనీ, ఈ వ్యవహారంపై స్పందించకపోతే, పరువు నష్టం దావా వేస్తామనీ సోము వీర్రాజు తన లేఖాస్త్రంలో అల్టిమేటం జారీ చేశారు.

రాజకీయాల్లో ఇదో కొత్త పోకడగానే చెప్పుకోవాలి. ‘పరువు నష్టం దావా’ అంటూ, ఓ పార్టీ రాష్ట్ర శాఖ అధ్యక్షుడు, డీజీపీకి లేఖ రాయడమంటే చిన్న విషయం కాదు. నిజానికి, అంతర్వేది రధం దగ్ధం వంటి పెద్ద కేసుల్లో నిందితుల్ని పట్టుకుని, వారెవరన్నది తేల్చాల్సిన పోలీసులు, దుష్ప్రచారానికి కారకులంటూ విపక్షాలకు చెందినవారిపై కేసులు పెట్టడం ఒకింత ఆశ్చర్యకరంగానే వుంది. కొండని తవ్వి ఎలుకని కూడా పట్టుకోలేని వైనం.. అనే విమర్శలు రాజకీయ పరిశీలకుల నుంచీ వినిపిస్తున్నాయి.