నీ స్నేహితుడ్ని ఎవరైనా తిడితే ఏం చేస్తావ్.? స్నేహితుడ్ని వెనకేసుకొస్తావ్.! స్నేహితుడి కోసం అవసరమైతే ఎవరితో అయినా కొట్లాడతావ్.! ఇది స్నేహ ధర్మం.!
కానీ, కమెడియన్ అలీ ఏం చేశాడు.? స్నేహితుడు పవన్ కళ్యాణ్‌ని నానా దుర్భాషలాడుతున్నవారితో జత కట్టాడు.! రాజకీయాలు వేరు, స్నేహం వేరు.. అని సొల్లు కబుర్లు కుదరవిక్కడ. స్నేహమంటే స్నేహమే. పవన్ కళ్యాణ్ స్నేహితుడిగా అలీకి వున్న గుర్తింపు, గౌరవం గురించి ఎంత చెప్పుకున్నా తక్కువే. కానీ, అదంతా ఒకప్పుడు. పవన్ కళ్యాణ్‌కి అలీ స్నేహితుడిగా వున్నంత కాలమే.
ఆ స్నేహాన్ని చెడగొట్టుకున్నాడు కమెడియన్ అలీ.! సరే, రాజకీయంగా అలీకి వేరే ఆలోచనలు వుండొచ్చు. అది తప్పు కాదు. కానీ, పవన్ కళ్యాణ్‌ని ద్వేషించే పార్టీలో చేరడం, పవన్ కళ్యాణ్‌ని తిడుతున్నవారితో చేతులు కలపడం, పవన్ కళ్యాణ్‌ని ఎగతాళి చేయడం.. ఇదంతా ఏంటి.?
‘నేనెవరి మీదా వ్యక్తిగతంగా విమర్శలు చేయలేదు..’ అంటూ అలీ ఇప్పుడు సుద్దపూస కబుర్లు చెబుతున్నాడు. రాజకీయాలకు గుడ్ బై చెప్పేసినట్లూ ప్రకటించేశాడు అలీ. అసలు రాజకీయాల్లో అలీ సాధించింది ఏంటి.? ఒకప్పుడు తెలుగు దేశం పార్టీ, ఆ తర్వాత వైఎస్సార్ కాంగ్రెస్ పార్టీ.. ఇప్పుడేమో, రాజకీయ సన్యాసం.!
అదే, పవన్ కళ్యాణ్ వెంట అలీ నడిచి వుంటే.? ఈ రోజు రాజకీయాల్లో అలీ స్థాయి వేరే లెవల్‌లో వుండేది. వైసీపీ నేతలు పవన్ కళ్యాణ్‌ని నానా దుర్భాషలు ఆడుతోంటే, ఏనాడూ వారిని వారించిన పాపాన పోలేదు అలీ. ఇప్పుడు రాజకీయాలకు దూరమంటున్న అలీ, పవన్ కళ్యాణ్‌తో పాత స్నేహాన్ని తిరగతోడే ప్రయత్నం చేస్తాడేమో.
‘అలీని మాత్రం దగ్గరకు రానివ్వొద్దు..’ అని పవన్ కళ్యాణ్‌కి ఆయన అభిమానులు సూచిస్తున్నారు. సరే, పవన్ కల్యాణ్ ఎలాంటి నిర్ణయం తీసుకుంటారన్నది వేరే చర్చ. రాజకీయాలకు గుడ్ బై చెబుతూ, ‘నేను సుద్ద పూసని.. నేను సేవా కార్యక్రమాలు చేశాను..’ అని అలీ చెప్పుకున్నా, ఆయన మీద కాస్తంత సింపతీ కూడా వచ్చే పరిస్థితి లేదు.
వైసీపీ హయాంలో పదవులు అనుభవించి, వైసీపీ ఓడిపోగానే పార్టీ వదిలేశాడంటూ వైసీపీ నుంచి విమర్శలూ అలీ ఎదుర్కోవాల్సి వస్తోంది. రెంటికీ చెడ్డ రేవడిలా తయారైంది అలీ పరిస్థితి.