జస్ట్ ఆస్కింగ్: ఏకగ్రీవాలపై ఆ హక్కు కోర్టులకు లేదా.?

రాష్ట్రంలో ఏకగ్రీవాలపై పొలిటికల్ రచ్చ కొనసాగుతోంది. పంచాయితీ ఎన్నికల్లో గెలిచేందుకు పెద్దయెత్తున ఖర్చు చేశారు కొందరు ప్రభుద్ధులు. డబ్బు, మద్యం.. ఇవి కాక అదనంగా ‘అధికారం’ వెరసి, నానా రకాల చెత్త రాజకీయం ప్రదర్శించి కొన్ని చోట్ల ఏకగ్రీవంగా ఎన్నికయ్యారు. పంచాయితీ ఎన్నికల్లో మాత్రమే కాదు, పరిషత్ ఎన్నికల్లోనూ ఇలాంటి పరిస్థితే కనిపిస్తుంటుంది.

అసలు ఏకగ్రీవాల వెనుక నికృష్ట రాజకీయం జగమెరిగిన సత్యం. ఎవరు అధికారంలో వుంటే, వారికి అనుకూలంగా ఏకగ్రీవాలు జరుగుతుంటాయి. ఇప్పుడూ అదే జరిగింది. కానీ, గతంలో ఎప్పుడూ లేనంత వివాదాస్పదంగా ఈసారి ఏకగ్రీవాలు జరుగుతున్నాయి. వాటిపై నానా రచ్చా జరుగుతోంది.

ఓ న్యాయవాది ఓ మీడియా సంస్థతో మాట్లాడుతూ, ఏకగ్రీవాలపై జోక్యం చేసుకునే హక్కు న్యాయ స్థానాలకు వుండదని సెలవిచ్చారు. ఇదెక్కడి పైత్యం.? అని జనం ముక్కున వేలేసుకుంటున్నారు. ఇంటికెళ్ళి చావబాది మరీ, విపక్షాలకు చెందిన అభ్యర్థులెవరూ నామినేషన్లు వేయకుండా చేశారు అధికార పార్టీ నేతలు కొన్ని చోట్ల.

ప్రతిపక్షం తెలుగుదేశం పార్టీకి చెందిన ఇద్దరు ముఖ్య నేతల్ని వెంబడించి, చంపేయాలనుకున్నారు అధికార పార్టీకి చెందిన నేతలు. ఇంత గొప్పగా రాష్ట్రంలో ఎన్నికల ప్రసహనం నడుస్తోంది. అయినాగానీ, కోర్టులు ఏకగ్రీవాలపై జోక్యం చేసుకోకూడదట. అది కూడా, ఇదే విషయమై కోర్టులో విచారణ జరుగుతుండగా ఓ న్యాయవాదితో ‘కోర్టుకు అధికారం లేదు’ అని అధికార పార్టీకి చెందిన మీడియా మాట్లాడిస్తుండడం ఒకింత ఆశ్చర్యకరంగా తయారైంది.

ఫామ్ 10 ఇచ్చిన ఏకగ్రీవాలకు సంబంధించి విచారణ చేయొద్దంటూ హైకోర్టు రాష్ట్ర ఎన్నికల కమిషన్‌కి స్పష్టమైన ఆదేశాలిస్తూ మధ్యంతర ఉత్తర్వులిచ్చింది. కోర్టు తుది తీర్పులో ఏం తేల్చుతుందో ఇప్పుడే చెప్పలేం. కానీ, కోర్టులకే ఆ అధికారం లేదని న్యాయవాదులు చెప్పేస్తే.. బాధితులైన అభ్యర్థులు న్యాయం కోసం ఎక్కడికి వెళ్ళాలి.?