గణతంత్ర దినోత్సవాన ఎర్రకోటపై సిక్కు జెండా.!

దేశ చరిత్రలో ఇంతకు ముందెన్నడూ జరగని ఘటన ఇది. దేశ ఆత్మగౌరవానికి ప్రతీక.. అని చెప్పుకోదగ్గ ఎర్రకోటపై సిక్కు జెండా ఎగిరింది. కేంద్రంలోని నరేంద్ర మోడీ సర్కార్ ఇటీవల తెచ్చిన కొత్త వ్యవసాయ చట్టాల్ని రైతు సంఘాలు తీవ్రంగా వ్యతిరేకిస్తున్న విషయం విదితమే. ఈ క్రమంలో గత కొద్ది రోజులుగా ఢిల్లీ శివార్లలో రైతులు ఆందోళనలు చేస్తున్నారు.

గణతంత్ర దినోత్సవం నేపథ్యంలో రైతులు ట్రాక్టర్ ర్యాలీ చేపట్టారు. ర్యాలీకి సంబంధించి ముందస్తు అనుమతులు కూడా తీసుకున్నారు. న్యాయస్థానాల జోక్యంతో, నిబందనల మేరకు అనుమతులు లభించాయి. అయితే, గణ తంత్ర దినోత్సవ వేడుకలు ముగిశాక మాత్రమే ట్రాక్టర్ ర్యాలీ నిర్వహిస్తామని ప్రకటించిన రైతు సంఘాలు, దానికి భిన్నంగా.. వేడుకలు ముగియక ముందే, ర్యాలీ షురూ చేశాయి. ఆ ర్యాలీలో వేలాది ట్రాక్టర్లు ముందుగా అనుకున్న మార్గంలో కాకుండా, వేర్వేరు మార్గాల్లో ఢిల్లీలోకి చేరుకున్నాయి.

ఈ క్రమంలో రైతులకు, పోలీసులకు మధ్య వాగ్యుద్ధం, తోపులాట జరిగాయి. పోలీసులు లాఠీ ఛార్జి చేయాల్సి వచ్చింది.. భాష్ప వాయువు గోళాల్నీ (టియర్ గ్యాస్) ప్రయోగించాల్సి వచ్చింది. ఓ దశలో పరిస్థితి అదుపు తప్పడం, పలువురికి ఈ గలాటాలో తీవ్రగాయాలవడంతో పోలీసులు, ఆందోళనకారుల్ని అదుపు చేయలేక చేతులెత్తేశారు.

పోలీసులు, రైతుల మీద దాడి చేస్తున్నారంటూ, ట్రాక్టర్లు నడుపుతున్న రైతులు.. తమ ట్రాక్టర్లను రైతుల మీదకు దూకించారు. మరోపక్క, ఎర్రకోట పైకెక్కిన రైతులు, జాతీయ జెండాలతోపాటు, రైతు జెండాల్ని ,సిక్కు జెండా చేతపట్టి ఎర్రకోటపై ఎగురవేయడం గమనార్హం. ‘భారత్ మాతా కీ జై’ అనే నినాదాలతోపాటు, ‘జై కిసాన్’ అంటూ నినాదాలు ఎర్రకోట పరిసర ప్రాంతాల్లో హోరెత్తాయి. రైతుల ముసుగులో అసాంఘీక శక్తులు ఈ చర్యలు పాల్పడ్డాయంటూ బీజేపీ నేతలు ఆరోపణలు చేస్తుండగా, రైతులు అత్యంత శాంతియుతంగా ఆందోళనలు చేస్తోంటే, ప్రభుత్వమే రెచ్చగొడుతోందని రైతు సంఘాలు మాటల దాడికి దిగాయి.

ఏదిఏమైనా, భారత గణతంత్ర దినోత్సవ వేడుకల్ని ప్రపంచమంతా ఆసక్తిగా తిలకిస్తున్న వేళ, రైతులు అత్యుత్సాహం చూపారన్నది నిర్వివాదాంశం. అదే సమయంలో, కొత్త వ్యవసాయ చట్టాల విషయంలో రైతుల అభ్యంతరాల్ని పరిగణనలోకి తీసుకోకుండా, సమస్యను సాగదీసి, పరిస్థితి అదుపు తప్పడానికి కారణమైన కేంద్ర పాలకుల్నీ తప్పు పట్టకుండా వుండలేం.