రిజల్ట్ తో సంబంధం లేకుండా ప్రేక్షకులను అలరిస్తున్నారు కిరణ్ అబ్బవరం. ఇప్పుడు ఈ యంగ్ టాలెంటెడ్ హీరో భారీ పీరియాడిక్ థ్రిల్లర్ మూవీతో ప్రేక్షకుల ముందుకు రాబోతున్నట్లు తెలుస్తోంది. బ్యాక్ టు బ్యాక్ సినిమాలు చేస్తూ సక్సెస్ అందుకున్న కిరణ్ ఇటీవల చిన్న బ్రేక్ తీసుకున్నారు. ఏడాది తర్వాత ఆయన నటిస్తున్న కొత్త సినిమా వివరాలను చెప్పబోతున్నట్లు తెలుస్తోంది. శ్రీ చక్ర ఎంటర్టైన్మెంట్స్ బ్యానర్ లో గోపాలకృష్ణ నిర్మిస్తున్న ఈ చిత్రాన్ని దర్శకద్వయం సుజిత్, సందీప్ తెరకెక్కిస్తున్నారు. 20 కోట్ల భారీ బడ్జెట్ తో నిర్మిస్తున్న ఈ సినిమాకి కిరణ్ ప్రెజెంటర్ గాను వ్యవహరిస్తున్నారట.
ఈ సినిమా ఇప్పటికే చిత్రీకరణ పూర్తి చేసుకుని.. పోస్ట్ ప్రొడక్షన్ కార్యక్రమాలు జరుపుకుంటుంది. సెప్టెంబర్ లేదా అక్టోబర్ నెలలో ఈ మూవీని విడుదల చేసేందుకు మేకర్స్ ప్లాన్ చేస్తున్నట్లు తెలుస్తోంది. తెలుగుతోపాటు తమిళ, మలయాళ, కన్నడ భాషల్లో విడుదల చేయబోతున్నారట. ఈ చిత్రానికి శ్యామ్ సీఎస్ సంగీతాన్ని అందిస్తున్నారు. ఇతర తారాగణం వివరాలు తెలియాల్సి ఉంది.