Nassar: కెరీర్ తొలినాళ్లలో మెగాస్టార్ (Mega Star) చిరంజీవి (Chiranjeevi) ఆదరించిన తీరు ఎప్పటికీ మరచిపోలేనన్నారు విలక్షణ నటుడు నాజర్ (Nassar). ఓ ఇంటర్వ్యూలో మాట్లాడుతూ.. ‘ఫిలిం ఇనిస్టిట్యూట్ శిక్షణ పూర్తయ్యాక చిన్న పాత్రలు వచ్చేవి. చిత్రీకరణకు మా ఇంటి నుంచి 6కే బయలుదేరాలి. మా అమ్మగారు ఒక్కోసారి వంట చేయలేక అన్నం మాత్రమే వండేవారు’.
‘అప్పట్లో చిరంజీవికి ఆంధ్రా మెస్ నుంచి భోజనం వచ్చేది. సాంబారు, కూరల కోసం చూసేవాడిని. ఓసారి చిరంజీవి గమనించి.. అమ్మను ఇబ్బందిపెట్టొద్దు. రేపటి తనతోపాటే భోజనం చేయాలన్నారు. షూటింగ్ పూర్తయ్యే వరకూ ఆయనతోనే తిన్నా. తర్వాతా అవకాశాలు రాకపోవడంతో తాజ్ కోరమాండల్లో వెయిటర్ గా చేరా’.
‘ఓరోజు ఫిలిం చాంబర్లో చిరంజీవి షూటింగ్ అంటే వెళ్లి వచ్చేశా. వచ్చానని తెలుసుకున్న చిరంజీవి కబురు పంపారు. ఏం చేస్తున్నావంటే చెప్పా. రేపు వచ్చి తనను కలవమన్నారు. కానీ.. ఆత్మాభిమానం అడ్డొచ్చి వెళ్లలేదు’.
‘తర్వాత చిరంజీవి పెద్ద స్టార్ అయ్యారు. నేను బాలచందర్ సినిమాలతో సెటిల్ అయ్యా. చిరంజీవితో చేసిన సినిమాలు పెద్దగా లేవు. ఖైదీ నెంబర్ 150లో చిన్న వేషమే అయినా.. చిరంజీవి కోసమే చేశా’నని నాటి జ్ఞాపకాలు పంచుకున్నారు.