ఢిల్లీపై దాడి: రైతు వెనుక రాక్షసత్వం ఎవరిది.?

దేశ రాజధాని ఢిల్లీలో అలజడి.. దేశంపై దాడిగా కొందరు అభివర్ణిస్తున్నారు.. ఎర్రకోటపై జాతీయ జెండా అంటే, అది దేశ ప్రజల ఆత్మగౌరవం కిందే లెక్క. అలాంటి ఆత్మగౌరవం మీద దాడి జరిగింది. ఇది కేవలం ఢిల్లీ మీద దాడి కాదు, దేశ ప్రజలందరిపై దాడి.. అనే భావన అంతటా వ్యక్తమవుతోంది. ‘ఎర్రకోటపై ఎగిరిన రైతు జెండా’ అనడం వరకూ బాగానే వుంది. కానీ, ఆ రైతు జెండాతోపాటు, ‘వేర్పాటవాదం’ జెండా కూడా వుందనే ప్రచారం ఇప్పుడు అందర్నీ విస్మయానికి గురిచేస్తోంది. కలిస్తాన్ వేర్పాటువాద సంస్థకు చెందిన కొందరు ఆ ‘వాదం’తో కూడిన జెండాల్ని ఢిల్లీలో రైతులు చేపట్టిన ఆందోళనలో ప్రదర్శించారు.. ఎర్రకోటపైన కూడా అదే జెండా, రైతుల జెండాతో కలిసి ఎగిరిందంటూ వస్తున్న వార్తలు దేశ ప్రజానీకాన్ని కలచివేస్తున్నాయి.

‘అబ్బే, అది వేర్పాటువాదుల జెండా కాదు’ అని కొందరు చెబుతున్నా, ‘కాకపోవడమేంటి.?’ అంటూ ఇంకొందరు సాక్ష్యాలు చూపిస్తున్నారు. ఇదెక్కడి పైత్యం.? అసలు ఎందుకీ విపరీతం చోటు చేసుకుంది.? రెండు నెలలుగా ఢిల్లీ శివార్లలో అనేక కష్ట నష్టాలకోర్చి శాంతియుతంగా ఆందోళన చేస్తున్న రైతుల్ని తప్పుదోవ పట్టించేందుకు, వారి ఉద్యమాన్ని నీరుగార్చేందుకే ఈ కుట్ర జరిగిందన్నది ఓపెన్ సీక్రెట్. కానీ, ఈ కుట్రకు పాల్పడిందెవరన్నదే తేలాలిప్పడు. రైతు సంఘాల నేతలు కొందరికి ఇప్పటికే నోటీసులు జారీ అయ్యాయి. పలువురి అరెస్టులూ జరిగాయి. కొందరిపై లుక్ ఔట్ నోటీసులు కూడా జారీ చేశారు పోలీసులు. నటుడు, గాయకుడు దీప్ సిద్దు ఇప్పుడు ఈ వివాదంలో కార్నర్ అయ్యాడు. అతనే, ఈ మొత్తం రగడకు కారణమన్న అనుమానాలు వ్యక్తమవుతున్నాయి. ఒక్కటి మాత్రం నిజం.. 350 మందికి పైగా పోలీసులకు ఈ ఘటనలో గాయాలయ్యాయంటే, ఇది ఉద్యమం కాదు.. రాక్షసత్వమే.

రైతు ఎప్పుడూ ఇతరులకు హాని తలపెట్టడు. అలా హాని తలపెట్టేవాడు రైతే కాదు. అదే వాదన ఆందోళన చేస్తున్న రైతుల నుంచీ వ్యక్తమవుతోంది. ‘మేం నిఖార్సయిన భారతీయులం.. మా మధ్యలోకి కొన్ని అసాంఘీక శక్తులు చొరబడ్డాయి.. అలాంటివారిపై కఠిన చర్యలు తీసుకోండి..’ అని రైతులు చెబుతున్నారు. ఇది దేశ ఆత్మగౌరవానికి సంబంధించిన అంశం. రాజకీయాలకు తావివ్వకుండా కుట్రదారుల్ని అవసరమైతే ఉరికంబమెక్కించడానికీ కేంద్ర ప్రభుత్వం వెనుకాడబోదని ఆశిద్దాం.